تلسكوبنا مش خربان

آخر تحديث : الثلاثاء 4 يونيو 2019 - 5:40 مساءً
تلسكوبنا مش خربان

بقلم رشيد حمدان

كم سؤال عالماشي للناس الي قرروا انه اليوم عيد بفلسطين وخالفوا الإجماع،

– ايش موقفك لما رحت على المسجد تصلي صلاة العيد ولقيت المعتكفين نايمين بعد صلاة الفجر؟

– ايش موقفك لما رحت تعيد على امك ولقيتها لابسه الشال وبتقرأ قرآن أو جنب الفرن بتخبز كعكات العيد ؟ وتقولك سلامتك يما ليش صاحي بدري اليوم؟

– ايش موقفك لما رحت تعيد على أختك وما فتحلك الباب لانها نايمة بعد ما جهزت السحور للولادها؟

– ايش حكيت لابنك لما لبس أواعي العيد ونزل على الحارة يلعب ولقي حاله لحاله لانه اولاد الحارة لسا نايمين؟ وطبعا مطعم الشاورما مسكر.( بهاي انا عن جد شفقان عليك، لانك كيف بدك تشرحله انه هو اليوم عيد بس مش عيد!! ومطعم الشاورما فاتح بس مش فاتح!!؟؟ )

– دخلك لما تروح عند بنت اختك بعد الظهر وما تقدملك معمول وتحكيلك معلش يا خالو رمضان كريم ، شو رح تحكيلها؟

– يا زلمة بلاش هاد كله بس بدي اسألك .. كيف ربنا سبحانه وتعالى بده يقبل منك لما تدعي على رجل الأمن المباركة يده وهو صائم والي منعك تفطر جهارا نهارا برمضان على اعتبار انه لك دين ولكل الشعب دين؟

– طيب عشان تثبت لاولادك انه اليوم عيد شو حكيتلهم بالله عليك؟ مثلا انه تلسكوبنا خربان؟

لست عالما بأمور الدين والفقه والشريعة ولكني استطيع وبعد العودة لما تفضل به فضيلة مفتي القدس بأن اليوم الثلاثاء هو المتمم لشهر الخير والبركة شهر رمضان، استطيع ان اقول لكم انكم خرجتم عن الاجماع وحاولتم شق الصفوف لولا منعكم من قبل جهات الاختصاص وابناء شعبنا العظيم الحريصين والذين رفضوا تصرفكم الخارج عن الاجماع والقانون. 

كل عام وامة المسلمين بألف خيركل عام وفلسطين وشعبها بأقصاها وقيامتها بألف خيركل عام وتلسكوب فلسطين بألف خيركل عام وانتم جميعا بألف خير

 
رابط مختصر
2019-06-04
Bashar